O meu primeiro contacto coa lutería foi a través dunha zanfona. Foi así, como cunha caixa de viño de madeira, nubes de po, e moita ilusión, púxenme mans á obra. Cando finalizo "aquel instrumento" (e grazas a un antigo mestre de guitarra), coñezo ao luthier Cesar Arias. Ao descubrir aquel obradoiro quedei prendado, entendín por primeira vez como madeira e música viaxaban da man naquel lugar.

De natureza inqueda, tomo un rumbo diferente e decido estudar Socioloxía, pero coa lutería dando voltas de cando en vez pola miña cabeza. Deste xeito, ao finalizar aquel periplo universitario; salto ao campo da lutería e saco as primeiras virutas coa axuda do mestre Ramón Casal na Escola de Artes e Oficios de Vigo (EMAO). Ao finalizar o primeiro ano matrícúlome na Escola Vasca de Lutería de Bilbao (BELE) onde aprendo durante tres anos de man de Unai Igartua, Luís Artola, Jabier Guraya e Ander Arroitajauregui; a escola ábreme as portas a acudir a cursos de formación con profesionais como Silvio Levaggi, Michele Dobner, Philip Ihle e Sergio Chanquía entre outros.

Foi aquí onde coñezo ao luthier e amigo Carlos Barrós e a Blai Sintes (Bilbao) quen me apoian e axudan complementando a formación da escola.

No último ano de estudos -e posterior á súa finalización- teño a oportunidade de facer estadías de traballo e formación con Asier de Benito (Valencia), José Catoira (A Coruña), Naiara Maiztegui (Barcelona), Pablo Sanz (Valladolid) e finalmente grazas á bolsa ERASMUS viaxo a Chipre onde teño o privilexio de formarme con Stepan Soultanian co que asento disciplina e técnica de traballo.

Actualmente teño obradoiro propio na Coruña onde proporciono un servizo ao músico de corda frotada de profesionalidade, calidade e proximidade.